2017-imi inuusuttut ilinniarnerat suliffeqarnerallu
2017-ip naanerani Kalaallit Nunaanni inuusuttut 16-it 25-llu akornanni ukiullit 5.506-it imaluunniit 66 procentii ilinniarfinnut suliffeqarfinnulluunniit atassuteqarput. Taakkunannga 29 procentii ilinniakkamik ingerlatsipput, 37 procentiilu suliffeqarlutik.
2017-imi inuusuttut ilinniakkamik ingerlatsinngitsut suliffeqanngitsulluunniit 34 procentinik annertussuseqarput. 2014-imiilli 4 procentpointinik appariarsimapput. Piffissamilu pineqartumi inuusuttut suliffillit annertussusaat 6 procentpointinik qaffariarsimavoq, ilinniakkamillu ingerlatsisut 3 procentpointinik appariarsimallutik.
Titartagaq 1. Inuusuttut 16-it 25-llu akornanni ukiullit nalunaarsorsimanerat malillugu, 2010-2017
Najoqqutaq: Naatsorsueqqissaartarfik – kisitsisaataasivimmi kisitsisit takukkit (http://bank.stat.gl/UDDUMG3).
Nalunaarut: Tabelimi inuusuttut Kalaallit Nunaata avataani efterskolertut ilinniakkamillu ingerlatsisut ilanngunneqarput
Inuusuttut sullinniakkat
Saqqummersitami matumani Kalaallit Nunaanni inuusuttut suliffeqarnerat ilinniarnerallu sammineqarpoq. Inuusuttut ilinniakkamik ingerlatsinngitsut imaluunniit suliffeqanngitsut inuusuttunik sullinniakkanik taaneqarput.
Inuusuttuni sullinniakkani pineqarput inuusuttut suliffeqanngitsut aammalu suliffissarsiortutut nalunaarsorsimanngitsut. Periaatsimut immikkoortumi nassuiaat malillugu inuusuttut ilinniakkamik ingerlatsisutut nalunaarsorsimasut, Ilinniagaqarnersiuteqartitsivimmili nalunaarsorsimanngitsut, inuusuttunut sullinniakkamut ilanngunneqarput.
2017-imi innuttaasut akornanni inuusuttut 8.293-it ataani takutinneqarput. Inussuttut ilinniakkamik ingerlatsisut saniatigullu suliffillit ilinniakkamik ingerlatsisutuinnaq nalunaarsorneqarput. Ilinniakkamillu ingerlatsisut efterskolernermut, inuusuttunut ilinniarfinnut ingerlariaqqiffiusumillu ilinniarnermut immikkoortiterneqarput.
Titartagaq 2. 2017-imi inuusuttunut 16-it 25-llu akornanni ukiulinnut nalunaarsuutit
Najoqqutaq: Naatsorsueqqissaartarfik – kisitsisaataasivimmi kisitsisit takukkit (http://bank.stat.gl/UDDUMG3).